Arvind Kejriwal: ఢిల్లీ ముఖ్యమంత్రి అరవింద్ కేజ్రీవాల్ బెయిల్ పిటిషన్‌పై సుప్రీంకోర్టు గురువారం విచారణ చేపట్టనుంది. ఢిల్లీ ఎక్సైజ్ పాలసీ స్కామ్‌లో తనను సీబీఐ అరెస్టు చేయడాన్ని ఆయన పిటిషన్‌లో సవాలు చేశారు. జస్టిస్ సూర్యకాంత్, జస్టిస్ ఉజ్జల్ భుయాన్‌లతో కూడిన ధర్మాసనం ఈ పిటిషన్ పై విచారణ జరపనుంది. ఈ కేసులో కౌంటర్‌ అఫిడవిట్‌ దాఖలు చేసేందుకు సీబీఐకి ఆగస్టు 23న సుప్రీంకోర్టు అనుమతినిస్తూ, కేజ్రీవాల్‌కు సమాధానం ఇచ్చేందుకు రెండు రోజుల గడువు ఇచ్చింది. జ్రీవాల్‌ బెయిల్ తిరస్కరణపైనా, సీబీఐ అరెస్టుపైనా రెండు వేర్వేరు పిటిషన్లు దాఖలు చేశారు. తన అరెస్టును సమర్థిస్తూ ఢిల్లీ హైకోర్టు ఆగస్టు 5న ఇచ్చిన ఉత్తర్వులను ఆయన సవాలు చేశారు.
ఆప్ చీఫ్‌ అరవింద్ కేజ్రీవాల్ ను జూన్ 26న సీబీఐ అరెస్ట్ చేసింది. ఈ కేసులో కేజ్రీవాల్‌కు మధ్యంతర బెయిల్ మంజూరు చేయడానికి ఆగస్టు 14న సుప్రీంకోర్టు నిరాకరించింది. అతని అరెస్టును సవాలు చేస్తూ ఆయన చేసిన పిటిషన్‌పై దర్యాప్తు సంస్థ ప్రతిస్పందనను కోరింది.
మనీలాండరింగ్ కేసులో బెయిల్
జూలై 12న, మనీలాండరింగ్ కేసులో కేజ్రీవాల్‌కు సుప్రీంకోర్టు మధ్యంతర బెయిల్ మంజూరు చేసింది. అయితే సీబీఐ కేసులో నిందితుడిగా ఉన్న ఆయన ఇంకా జ్యుడీషియల్ కస్టడీలోనే ఉన్నారు. ఢిల్లీ ఎక్సైజ్ పాలసీ స్కామ్ కు సంబంధించిన మనీలాండరింగ్ కేసులో మార్చి 21న ముఖ్యమంత్రి నివాసం నుంచి తొలిసారిగా ఈడీ అరెస్టు చేసిన సంగతి తెలిసిందే.
Arvind Kejriwal: అరవింద్ కేజ్రీవాల్ బెయిల్ పిటిషన్ పై రేపు విచారణ
