Tata Group: టాటా గ్రూప్ గౌరవ ఛైర్మన్ రతన్ టాటా ఈ లోకాన్ని విడిచిపెట్టి వెళ్లిపోయారు. ఈరోజు ఆయన అంత్యక్రియలు కూడా ముగిశాయి. ఇప్పుడు ఆయన నిష్క్రమణ తర్వాత, టాటా వారసుడు ఎవరు అనేది అతిపెద్ద ప్రశ్న. అనేక దేశాల జీడీపీ కంటే టాటా గ్రూప్ ఆదాయం ఎక్కువగా ఉన్నందున వారసత్వం కూడా ముఖ్యమైనది. గత ఆర్థిక సంవత్సరంలో టాటా గ్రూప్ ప్రపంచంలోని 100 కంటే ఎక్కువ దేశాలలో వ్యాపారం చేయడం ద్వారా 165 బిలియన్ డాలర్ల ఆదాయాన్ని సంపాదించింది.
టాటా ట్రస్ట్ ఛైర్మన్‌గా ఎవరు నియమితులవుతారు?
టాటా గ్రూప్‌లోని అన్ని కంపెనీల యాజమాన్య హక్కులను టాటా సన్స్ కలిగి ఉంది. ఈ టాటా సన్స్‌లో 60 శాతానికి పైగా వాటా టాటా ట్రస్ట్ వద్ద ఉంది. నిన్నటి వరకు ఈ ట్రస్టుకు రతన్ టాటా చైర్మన్‌గా ఉన్నారు. ఇప్పుడు దాని ఉన్నత స్థానం ఖాళీగా ఉంది. దీని కొత్త అధ్యక్షుడిని ట్రస్టీ బోర్డు ఎంపిక చేస్తుంది. ఈ పదవి ఎవరిని వరిస్తుందో కాలమే నిర్ణయిస్తుంది. అయితే ట్రస్టు తదుపరి చైర్మన్‌గా నోయల్ టాటా లేదా సైరస్ మిస్త్రీ కుటుంబానికి చెందిన వారు ఎవరైనా ఎంపిక కావచ్చని మీడియాలో వార్తలు వచ్చాయి. ఇప్పటివరకు టాటా ట్రస్ట్‌కు పార్సీ వర్గానికి చెందిన వ్యక్తులు మాత్రమే నాయకత్వం వహించడం గమనార్హం.
నోయెల్ టాటా కమాండ్ తీసుకోవచ్చు
మీడియా నివేదికలను విశ్వసిస్తే, రతన్ టాటా సోదరుడు నోయెల్ టాటా ఈ ట్రస్ట్ బాధ్యతలు తీసుకోవచ్చు. ప్రస్తుతం టాటా ఇంటర్నేషనల్‌ ఛైర్మన్‌గా ఉన్నారు. ఆయనను రతన్ టాటా వారసుడిగా పరిగణిస్తున్నారు. ఆయన టాటా ట్రెంట్, వోల్టాస్‌కు కూడా నాయకత్వం వహించాడు. కానీ ఆయన ఎప్పుడూ లో-ప్రొఫైల్‌ మెయింటైన్ చేస్తూ ఉంటారు.
షాపూర్జీ పల్లోంజీ గ్రూప్ కూడా..
టాటా సన్స్‌లో 18.3 శాతం వాటాను కలిగి ఉన్న షాపూర్జీ పల్లోంజీ గ్రూప్‌కు టాటా గ్రూప్‌లో కూడా మంచి పట్టు ఉంది. అందుకే 28 డిసెంబర్ 1012న టాటా సన్స్ చైర్మన్ పదవి నుంచి రతన్ టాటా వైదొలిగినప్పుడు అదే కుటుంబానికి చెందిన సైరస్ మిస్త్రీ ఈ కంపెనీకి ఛైర్మన్ అయ్యారు. అయితే 2016లోనే ఈ పదవి నుంచి తప్పుకోవాల్సి వచ్చింది. అప్పటి నుంచి ఇరు కుటుంబాల మధ్య సఖ్యత కూడా చెడిపోయింది. కానీ షాపూర్జీ పల్లోంజీ గ్రూప్‌కు టాటా సన్స్‌లో తగినంత వాటా ఉంది, అది బోర్డ్‌రూమ్ నిర్ణయాలను ప్రభావితం చేయగలదు.
టాటా ట్రస్ట్‌కి కొత్త చైర్మన్‌గా ఎవరు వచ్చినా బాధ్యతలు, చేయాల్సిన పనులు చాలానే ఉంటాయి. ప్రస్తుతం రిజర్వ్ బ్యాంక్ మారిన నిబంధనల కారణంగా టాటా సన్స్ ను స్టాక్ మార్కెట్ లో లిస్ట్ చేయాలనే ఒత్తిడి వస్తోంది. అంతేకాకుండా, టాటా గ్రూప్ పని తీరును కొనసాగించడం సవాలుగా ఉంది. షాపూర్జీ పల్లోంజీ కుటుంబంతో సంబంధాలను పునరుద్ధరించుకోవడం కూడా నూతన ఛైర్మన్ కు సవాలుగానే ఉంటుంది.
