Thalapathy 69: కోలీవుడ్ స్టార్ హీరో తలపతి విజయ్ ప్రధాన పాత్రలో నటిస్తున్న #Thalapathy69 సినిమాపై ఇప్పటికే భారీ అంచనాలు నెలకొన్నాయి. ఈ చిత్రానికి ప్రముఖ దర్శకుడు హెచ్. వినోద్ దర్శకత్వం వహిస్తున్నారు, మరియు ప్రముఖ నిర్మాణ సంస్థ అయిన కేవీయన్‌ ప్రొడక్షన్స్ పతాకంపై వెంకట్‌ కె నారాయణ ఈ సినిమాను నిర్మిస్తున్నారు. ఇక ఈ మూవీలో విజయ్‌కు జోడీగా పూజా హెగ్డే నటిస్తోంది. ఇది ఆమె విజయ్‌తో రెండవ సినిమా కావడంతో మరింత ఆసక్తిని రేకెత్తిస్తోంది. తాజా సమాచారం ప్రకారం, ఈ చిత్రానికి సంబంధించిన ఓవర్సీస్ రైట్స్ భారీ మొత్తానికి అమ్ముడయ్యాయి. ఏకంగా రూ.78 కోట్లకు ఈ రైట్స్ విక్రయించబడ్డాయని సమాచారం. ఈ మొత్తం దేశీయంగా మాత్రమే కాకుండా, అంతర్జాతీయంగా కూడా విజయ్ సత్తా ఏ స్థాయిలో ఉందో తెలుస్తుంది.
వినూత్న కథా సారాంశంతో తెరకెక్కుతున్న ఈ చిత్రంలో బాలీవుడ్ నటుడు బాబీ డియోల్ విలన్ గా నటించబోతున్నాడు. గౌతమ్‌ వాసుదేవ మీనన్‌, నేషనల్‌ అవార్డ్ విన్నింగ్‌ యాక్ట్రెస్‌ ప్రియమణి, వెటరన్‌ యాక్టర్‌ ప్రకాష్‌ రాజ్‌, రెయిజింగ్‌ స్టార్ మమిత బైజు ప్రధాన పాత్రల్లో నటిస్తున్నారు. ఈ యాక్షన్ ఎంటర్‌టైనర్ పై ఫ్యాన్స్ భారీగా ఆసక్తి చూపిస్తున్నారు. అంతర్జాతీయ మార్కెట్‌లో ఇండియన్ సినిమాలకి గల డిమాండ్‌ విపరీతంగా పెరిగింది. విజయ్‌కు ఉన్న అంతర్జాతీయ ఫాలోయింగ్ ఈ సినిమా పై భారీ అంచనాలు ఏర్పరచింది. ఒకవైపు విడుదలకు ముందే ఇలా భారీ మొత్తంలో ఓవర్సీస్ రైట్స్‌ను సొంతం చేసుకోవడంతో, ఈ చిత్రం బాక్సాఫీస్ వద్ద రికార్డులను తిరగరాయబోతుందని అంచనా వేస్తున్నారు. 2025లో విడుదలకు సిద్ధమవుతున్న ఈ చిత్రం విజయ్ అభిమానులకు పండగను తీసుకురానుంది. అందులోనే విజయ్ సినిమా కెరీర్‌లో ఆఖరి చిత్రం కావడంతో ఈ సినిమాను అత్యంత భారీగా, తరాలు గుర్తుపెట్టుకునేలా తెరకెక్కించే పనిలో ఉన్నారు చిత్ర యూనిట్.
