Chiranjeevi: హైదరాబాద్ లోని అన్నపూర్ణ స్టూడియోలో అక్కినేని జాతీయ పురస్కార వేడుకలు ఘనంగా జరిగాయి. టాలీవుడ్ మెగాస్టార్ చిరంజీవికి బాలీవుడ్ మెగాస్టార్ అమితాబ్ బచ్చన్ తన చేతుల మీదుగా అక్కినేని జాతీయ అవార్డును ప్రదానం చేశారు. 2024 సంవత్సరానికి గానూ చిరంజీవికి అక్కినేని జాతీయ అవార్డు వరించింది. ఈ విషయాన్ని శతజయంతి రోజున అక్కినేని నాగార్జున అధికారికంగా ప్రకటించిన సంగతి తెలిసింది.
అక్కినేని జాతీయ అవార్డు ప్రదానంలో చిరంజీవి భావోద్వేగానికి గురయ్యారు. ఎవరైనా ఇంట గెలిచి రచ్చ గెలవాలంటారని.. తన సినీ ప్రస్థానంలో రచ్చ గెలిచానన్నారు. ఇంట గెలిచే అవకాశం సినీ వత్రోత్సవాల్లో వచ్చిందన్నారు. తనకు లెజెండరీ అవార్డు ప్రదానంతో ధన్యుడిగా భావించానన్నారు. తనకు లెజెండరీ అవార్డు ఇవ్వడాన్ని కొందరు హర్షించలేదని.. హర్షించనప్పుడు అవార్డు తీసుకోవడం సముచితం అనిపించలేదన్నారు. ఆరోజు లెజెండరీ అవార్డును క్యాప్సుల్ బాక్సులో వేశానన్నారు. పద్మవిభూషణ్ సహా ఎన్ని అవార్డులొచ్చినా.. ఆ అసంతృప్తి ఇంకా మిగిలే ఉందని చిరంజీవి పేర్కొన్నారు.
