Dulquer Salmaan: దుల్కర్ సల్మాన్ హీరోగా, మీనాక్షి చౌదరి జంటగా వస్తోన్న సినిమా “లక్కీ భాస్కర్”. టాలెంటెడ్ డైరెక్టర్‌ వెంకీ అట్లూరి దర్శకత్వం వహిస్తున్న ఈ చిత్రాన్ని సితార ఎంటర్‌టైన్‌మెంట్స్‌, ఫార్చూన్‌ఫోర్ సినిమాస్‌ పతాకాలపై సూర్యదేవర నాగవంశీ, సాయి సౌజన్య నిర్మించాు. ఈ నేపథ్యంలో అక్టోబర్ 27న సాయంత్రం హైదరాబాద్‌లో ప్రీ రిలీజ్ వేడుకను ఘనంగా నిర్వహించారు. ఈ వేడుకకు ప్రముఖ దర్శకుడు త్రివిక్రమ్ శ్రీనివాస్, రౌడీ హీరో విజయ్ దేవరకొండ ముఖ్య అతిథులుగా హాజరయ్యారు.
ఈ ప్రి రిలీజ్ వేడుకలో కథానాయకుడు దుల్కర్ సల్మాన్ మాట్లాడుతూ.. “తెలుగు ప్రేక్షకులకు నమస్కారం. హైదరాబాద్ నా సెకండ్ హోమ్. ఇదొక కొత్త జానర్ సినిమా. ఇదొక కొత్త ప్రయత్నం. ఇలాంటి సినిమా నిర్మించడానికి ముందుకు రావాలంటే ఎంతో ధైర్యం ఉండాలి. అలాంటి ధైర్యం వంశీ గారికి ఉంది. వెంకీ గారు చూడటానికి కాలేజ్ స్టూడెంట్ లా ఉంటారు. కానీ ఆయన రాసే సన్నివేశాలు, మాటలు గొప్పగా ఉంటాయి. ఆయన దర్శకత్వంలో నటించడం నటీనటులకు చాలా తేలికగా ఉంటుంది. తేలికగా ఆ పాత్రలలోకి, ఆ సన్నివేశాల్లోకి వెళ్ళిపోతాము. అందరం కలిసి ఒక కుటుంబంలా ఈ సినిమా చేశాము. అందరితో మంచి అనుబంధం ఏర్పడింది. మీనాక్షి అందంగా ఉండటమే కాదు, అంతే అందంగా నటించింది. ఈ సినిమాకి నేను మూడు భాషల్లో డబ్ చేశాను. ఈ సినిమాలో మీనాక్షి పాత్ర అందరికీ గుర్తుంటుంది. రిత్విక్ చాలా బాగా నటించాడు. త్రివిక్రమ్ గారికి నేను పెద్ద అభిమానిని. అల వైకుంఠపురములో సినిమా అంటే నాకు చాలా ఇష్టం. త్రివిక్రమ్ గారి రచనలో ఎంతో లోతు ఉంటుంది. ఒక కమర్షియల్ సినిమాలో కూడా లోతైన మాటలు రాయడం ఆయనకే చెల్లుతుంది. రాంకీ గారితో కలిసి పనిచేయడం గౌరవంగా భావిస్తున్నాను. విజయ్ దేవరకొండ నా తమ్ముడు. నా మహానటి, సీతారామం సినిమాలకు విజయ్ వచ్చాడు. ఆ రెండు సినిమాలు విజయం సాధించాయి. ఇప్పుడు లక్కీ భాస్కర్ కి వచ్చాడు. ఇది విజయం సాధిస్తుంది. విజయ్ నా లక్కీ చార్మ్. లక్కీ భాస్కర్ ఒక కామన్ మ్యాన్ స్టోరీ. ఇది మీ అందరికీ నచ్చుతుంది. ” అన్నారు.
